എ സി യിട്ട് വണ്ടി ഓടിച്ചാൽ.......

പഴയ കാല കാറുകളുടെ രൂപകൽപന (ഡിസൈൻ)

ആധുനിക കാറുകളുടെ എയ്റോ ഡൈനാമിക് ഫ്ലൂയിഡിക് രൂപകല്പന 

മൈലേജ്‌ കുറയുമെന്ന് കരുതി കാറിൽ എ സി ഉപയോഗിയ്ക്കാത്തവരുണ്ട്‌ .ഇതിന്  എന്തെങ്കിലും അടിസ്ഥാനമുണ്ടോ എന്ന് നമുക്ക് പരിശോധിയ്ക്കാം .മാരുതി കാറുകളാണെന്നു തോന്നുന്നു നമ്മുടെ നാട്ടിൽ ഫാക്ടറി ഫിറ്റഡ് എ സി യുമായി ആദ്യം പുറത്തിറങ്ങാൻ തുടങ്ങിയത്. അംബാസഡർ കാറുകൾ ഡീസൽ മോഡലുകളിലിറങ്ങിയെങ്കിലും എൻജിൻറ്റെ കാര്യക്ഷമത കുറവായതിനാൽ പവർ,മൈലേജ്  ഇവയെ എ സി ഫിറ്റ് ചെയ്യുന്നത് കുറയ്ക്കുകയും എൻജിൻ സംബന്ധമായുള്ള അറ്റകുറ്റപ്പണികൾ കൂടാനിടയാക്കുകയും ചെയ്തിരുന്നു.മെറ്റഡോർ കമ്പനിയുടെ ഡീസൽ എൻജിൻ പകരം വെച്ചാണ് പലരും അംബാസഡർ കാറുകളിൽ എ സി ഫിറ്റ് ചെയ്തു തുടങ്ങിയത്.എങ്കിലും ഈ പരീക്ഷണവും അധികകാലം വിജയിച്ചില്ല.ബജാജ് ടെമ്പോയുടെ മെറ്റഡോർ വാനുകളിൽ ഉപയോഗിച്ചിരുന്നതരം എൻജിൻ അംബാസഡർ കാറിൽ ഫിറ്റ് ചെയ്താലുണ്ടാകാവുന്ന പ്രശ്നങ്ങൾ ഊഹിയ്ക്കാമല്ലോ.അമിത ശബ്ദം ,വിറയൽ,പുകമലിനീകരണം,മെറ്റഡോർ എൻജിനും അംബാസഡറിൻറ്റെ അനുബന്ധഘടകങ്ങളുമായുള്ള ചേർച്ചക്കുറവ് ,ഇത് മൂലം അറ്റകുറ്റപ്പണികളിലെ അമിതച്ചെലവ്  എന്നിവ മെറ്റഡോർ എഞ്ചിനുകളെയും അംബാസഡറിൽനിന്നും അകറ്റി.ആദ്യമൊക്കെ പെട്രോൾ അംബാസഡർ കാറുകൾ ഡീസലൈസ് ചെയ്യാനാണ് മെറ്റഡോർ എൻജിനുകൾ ഉപയോഗിയ്ച്ചു തുടങ്ങിയത്.പിൽക്കാലത്ത് അംബാസഡർ കാറുകൾ കൂടുതൽ പവറുള്ള ജപ്പാൻ നിർമ്മിത ഇസുസു ഡീസൽ എൻജിനും കമ്പനി ഫിറ്റഡ് എ സിയുമൊക്കെയായി ഇറങ്ങിയെങ്കിലും അംബാസഡർ ബി എം സി പെട്രോൾ / ഡീസൽ എൻജിൻ കാറുകളുടെയത്ര സ്വീകാര്യത ലഭിച്ചില്ല.

ഹിന്ദുസ്ഥാൻ മോട്ടോർസ് ആഡംബരവാഹനമായ കോണ്ടെസ്സ ഇറക്കിയപ്പോൾ ഈ പ്രശ്നങ്ങളെല്ലാം താരതമ്യേന പരിഹരിയ്ക്കപ്പെട്ടെങ്കിലും പാസ്സഞ്ചർ വാഹനവിപണിയിൽ ഉണർവ്വുണ്ടാക്കാൻ കോൺടെസ്സയുടെ വരവ് സഹായകമായില്ല .

                                                                                    അംബാസ്സഡറിനൊപ്പം നിരത്തിൽ നിറഞ്ഞു നിന്നിരുന്ന പ്രീമിയർ പദ്‌മിനി(ഫിയറ്റ്)എ സി ഡീസൽ മോഡലുകൾ ഇറക്കിയെങ്കിലും വിപണിയിൽ കാര്യമായ സ്വീകാര്യത നേടിയില്ല.

                                                 എന്തുകൊണ്ടാണ് ആദ്യകാലങ്ങളിൽ വാഹനങ്ങളിൽ എ സി പ്രവർത്തിപ്പിയ്ക്കുമ്പോൾ  മൈലേജ് കുറയും എന്ന ധാരണ വന്നത്?അന്നിറങ്ങിയ വാഹനങ്ങളൊന്നും തന്നെ എയ്റോ ഡൈനാമിക് ഡിസൈൻ ഉള്ളവ ആയിരുന്നില്ല.വാഹനത്തിൽ എ സി പ്രവർത്തിയ്ക്കുമ്പോൾ എൻജിൻറ്റെ കറക്കത്തോട് കണക്ട് ചെയ്താണ് എ സി യുടെ മോട്ടോറും പ്രവർത്തിയ്കുന്നത്.പ്രവർത്തന ശക്തി കുറഞ്ഞ എൻജിൻ എ സി മോട്ടോർ പ്രവർത്തിപ്പിയ്ക്കാനും കൂടി വിനിയോഗിയ്ക്കേണ്ടി വരുന്നു.ഇത് മൂലം എൻജിൻറ്റെ പവർ കുറയാനും ഇന്ധന ഉപയോഗം കൂടാനും ഇടയായി എന്നതാണ് യാഥാർഥ്യം.

                                                                                   എന്നാലിക്കാലത്ത് എ സി യുടെ ഉപയോഗം വാഹനത്തിൻറ്റെ മൈലേജ് കുറയ്ക്കുമെന്നത് ഒരു തെറ്റിദ്ധാരണയോ പഴങ്കഥയോ ആയി മാറിയിരിയ്ക്കുന്നു.ശക്തിയും ഇന്ധനക്ഷമതയും കൂടിയ എൻജിൻ,കാറ്റിനെ പ്രതിരോധിയ്ക്കുന്നതിനു പകരം ഒഴുകിയിറങ്ങുന്ന വിധം കടന്നുപോവുന്ന  ഫ്ലൂയിഡിക് രൂപകല്പനയുമൊക്കെ ആധുനിക കാറുകളെ വ്യത്യസ്തമാക്കുന്നു.ഇത്തരം വാഹനങ്ങൾ ഗ്ലാസ് താഴ്ത്തിവെച്ച് ഓടിച്ചാൽ വേഗത കൂടുന്നതനുസരിച്ച് കാറ്റിനോട് വാഹനം പ്രധിരോധത്തിലാവുകയും കരുത്തും സ്മൂത്ത് നെസ്സും ഇന്ധനക്ഷമതയും കുറയുകയും ചെയ്യും.അന്തരീക്ഷത്തിലെ പൊടിയും പുകയും മാലിന്യങ്ങളുമൊക്കെ ഉള്ളിലേയ്ക്ക് കടന്ന്ആ രോഗ്യപ്രശ്നങ്ങളുണ്ടാക്കുകയും ചെയ്യും.അത് കൊണ്ട് വണ്ടിയുടെ മൈലേജിനും നമ്മുടെ മൈലേജിനും എ സി യിട്ട് കാർഓടിയ്ക്കുന്നത് തന്നെ നല്ലത്.